Қостанай облысында 23 вагон рельстен шығып кетті

Қостанай облысында Қазанбасы — Апановка бағытындағы жүк салынған пойыз рельстен шығып кетті. Бұл туралы «ҚТЖ-Жолаушылар тасымалы» АҚ баспасөз қызметіне сілтеме жасап Tengrinews.kz хабарлады.

Апат 24 мамырда сағат 14.40-та болған.

«Қостанай облысында Құсмұрын — Тобыл учаскесінде Қазанбасы — Апановка бағытымен шыққан жүк көлігінің машинисі тежегішті шұғыл басқан. Себебі локомотив манометрі вагондар арасындағы ауа қысымының төмендегенін көрсеткен. Салдарынан локомотивтің 23 вагоны рельстен шығып кетті. Теміржолдың байланыс желісіндегі тіреуіштері бүлінген», — деп мәлімдеді ҚТЖ баспасөз қызметіндегілер.

Бұл учаскеде жылдамдықты сағатына 70 шақырымнан асырмау жүру керек. Пойыз да сағатына 68-70 шақырым жылдамдықпен жүрген. Қазір апаттың салдары жойылып жатыр.

«Болған жағдайдың себебін анықтау үшін арнайы комиссия құрылды. Оның құрамында «ҚТЖ» ҰК» АҚ және «ҚТЖ-Жолаушылар тасымалы» АҚ басшылары бар», — деді ведомстводағылар.