Қорғаныс министрі әскердегі проблемаларды ашық айтуға уәде берді 

Әскердегі проблемаларға арналған брифингілер тұрақты түрде өткізіліп тұрады. Бұл туралы ҚР Қорғаныс министрі Руслан Жақсылықов мәлім етті, деп хабарлайды ҚазАқпарат.

«Екі аптада бір рет бұқаралық ақпарат құралдарына арналған ресми брифинг өткізуді жоспарлап отырмыз. Бұған дейін осындай тәртіпте мәлімет беру қарастырылмаған еді. Брифинг барысында жеке өзім, менің орынбасарларым және басқа да жауапты офицерлер тілшілердің кез келген сұрағына жауап беретін болады. Неғұрлым ашық болсақ, соғұрлым түсіністік қалыптасады. Сондықтан алдағы уақытта біз өткізетін брифингіге шақырамын», — деді Р.

Жақсылықов Мәжілісте тілшілердің сауалына жауап бере отырып. Бұдан бұрын хабарланғандай, бүгін ҚР Қорғаныс министрі Руслан Жақсылықов мерзімді әскери борышын өтеп жүргендер арасында өз-өзіне қол жұмсау жағдайларына қатысты пікір білдірді.