“Қазір сапасыз, бірақ маркетингі мықты фильмдер табысқа жетіп жатыр” (Видео)

Продюсер әрі психолог Нұргүл Даубаевамен сұхбат

Психолог әрі кино продюсер Нұргүл Даубаева Jas Qazaq тілшісіне берген сұхбатында шығармашылық пен шынайылық туралы ашық айтты.

— «Менің әкем тарихшы. Өзімнің де арманым – тарихи кинолар түсіру. Бірақ көрпеге қарап көсілу керек. Қазір қоғам не сұраса, соны жасауға мәжбүрмін. Себебі менің репутациям үшін де қаржы ауадай қажет. Бюджет болмаса, сапа жоғалады», — дейді ол.

Қазір ол комедиядан алыстап, фантастикалық драма жанрында жұмыс бастап кеткен. Бірақ бұл бағыт оған табыс әкелмеуі мүмкін екенін де жасырмайды.

— «Көрерменнің талғамы өсіп келеді. Ал маркетинг дұрыс болмаса, жасаған дүниең ешкімге жетпей қалады. Қазір сапасыз, бірақ маркетингі мықты фильмдер табысқа жетіп жатыр. Дегенмен мен үшін сапа мен маркетинг екеуі де маңызды», — дейді продюсер.

Психология саласына келгенде, Нұргүл жалған коучтар мен білімсіз мамандар көбейгенін ашық сынайды.

— «Білім алсаң, біреуге зияның тимеу керек. Өз басымнан өтті. Бір клиент маған басқа психологтан кейін келді. Бірақ ол травматерапияны білмеген. Салдарынан адамға көмектесе алмаған. Психологтың дипломы болуы керек. Одан бөлек, өзі де жеке терапиядан, гештальт әдісінен өтуі тиіс. Әйтпесе, өзі реттелмеген адам, өзгеге көмектесе алмайды», — дейді ол.

Олжас Әбдіхалық