
24 ақпанда Алматы қаласында Arlan MMA Pro Team ұйымы баспасөз мәслихатын өткізді. Жақында ғана UFC ұйымымен келісімшарт жасасқан Жалғас Жұмағұлов UFC-мен келісімшарты туралы айтып, алдағы жоспарларымен бөлісті, деп хабарлайды Prosports.kz. Жалғастың айтуынша, 1 жылдың ішінде 4 жекпе-жек өткізеді. Бірінші айқасын ол Нұр-Сұлтан қаласында өткізуді жоспарлап отыр: «UFC ұйымы жақын арада 16 маусымда Нұр-Сұлтанда өтетін турнир жайлы ресми хабарлама жасайды». «Қазіргі кезде АҚШ-қа визаны күтіп отырмын. АҚШ-та әлемнің үздік файтерлерімен спарринг өткізгім келеді. Қазақстанда да дайындығымды тоқтатпаймын. Елімізде де жақсы спортшылар бар. Мен әрқашан өзімнің бауырым Сергей Морозовпен жаттығу жасап, жекпе-жектеріме дайындаламын. UFC-де қазақтардың қандай батыр екендігін көрсеткім келеді, бұйыртса, UFC чемпионы атанып, тарихта қалу ойымда бар», — деді Жұмағұлов. Естеріңізге салайық, Жалғас Жұмағұлов 20 ақпанда UFC ұйымымен ресми келісімшартқа қол қойды. Бұл ұжыммен Жалғас Жұмағұлов пен Шавкат Рахмонов келісімшарт жасасқан. Одан қалды Ресейдің қазағы Дамир Ысмағұлов та UFC-де өнер көрсетіп жүр. Жалғас Жұмағұлов: Қазақ ұлдарының қайсарлығын UFC-де дәлелдесем деймін