Қазақстан Ресейдің сынақтан толық өтпеген вакцинасын сатып алады

Қазақстан Ресейдің әлі сынақтан толық өтіп бітпеген коронавирусқа қарсы вакцинасын сатып алатын болды. Екпенің екі миллионнан астам данасы елге жеткізуге екі ел арасында арнайы келісім-шарт бекітілді. Оны Қазақстанға «Ресейдің тікелей инвестициялар қоры» тасымалдап бермек. Бұл туралы КТК телеарнасы хабарлады.

«СҚ-Фармация» алдымен екпенің екі миллионнан астам данасын сатып алады. Кейін ол 5 миллионға дейін артуы мүмкін. Айта кетейік, қауіп тобына кіретін қазақстандықтарға екпе тегін және ерікті негізде жүргізіледі. Ал вакцинаны елге әкелу мерзімі әлі белгісіз. Өйткені препарат сынақтардың барлық сатысынан өткен жоқ. Бүгінгі күні ресейлік ғалымдар вакцинаның ақтық кезеңінде 40 мың ерікті адамға салып сынап жатыр. Күзде Ресейде жаппай вакцинациялау жұмыстары басталмақ. Әлемде алғаш боп тіркелген бұл екпеге қатысты алуан пікір бар. Еуропа елдері, АҚШ дәрінің сапасына күмәнданса, британдық вирусологтар коронавирусты мутацияға айналдырады деп отыр. Ал ресми Мәскеу мұнымен келіспейді. Ал бүгін Ресейдегі Гамалея орталығы Covid-19-дан қорғайтын ұнтақ әзірлеп шықты.