Қазақстан — Бельгия: Ықпалдастықты арттыруға мүмкіндік мол

Бүгін Президент Қасым-Жомарт Тоқаев Бельгия Королі және Патшайымымен кеңейтілген құрамда келіссөз жүргізді.
Ақордада өткен келіссөзде Мемлекет басшысы Қазақстан мен Орталық Азияға тарихта тұңғыш рет мемлекеттік сапармен келген Король Филипп пен Матильда Патшайымға ілтипатын білдірді.
«Келесі жылы мемлекеттеріміздің арасында дипломатиялық қарым-қатынас орнағанына 35 жыл толады. Сапарыңыз осы айтулы меженің дайындығына тың серпін береді және ынтымақтастығымызды нақты нәтижелермен толықтыра түседі. Бельгия Қазақстанның жетекші сауда серіктестерінің қатарына кіреді. Сонымен қатар еліңіз Қазақстан экономикасына қаржы құйған ең ірі он инвестордың бірі саналады. Мұны Қазақстан экономикасының келешегіне деген сенімнің айқын көрінісі деп бағалаймын», – деді Президент.
Мемлекет басшысы Қазақстан мен Бельгия арасында көлік-логистика, аса маңызды минералдар, жаңартылатын қуат көздері, ауыл шаруашылығы, денсаулық сақтау және жасанды интеллект салалары бойынша өзара ықпалдастықты кеңейтуге мол мүмкіндік бар екеніне назар аударды. Бельгия Королі Филипп қонақжайлық танытқаны үшін Мемлекет басшысына алғыс айтып, бұған дейін Тақ мұрагері ретінде Қазақстанға жасаған сапарларын еске алды:
«Сіздің басшылығыңызбен еліңіз дамудың даңғыл жолына түскеніне ерекше әсерлендік. Сапар кезінде танысу жоспарланған жасанды интеллект, энергетика, атом энергиясы салалары екі ел үшін өте маңызды. Ғалымдардың дөңгелек үстелдегі пікірталасына куә боламыз. Бізбен бірге университеттердің ректорларынан, компания өкілдерінен тұратын үлкен делегация келді».
Сондай-ақ келіссөз барысында екі елдің ресми делегация мүшелері сөз сөйледі.
Тараптар кездесу соңында көптеген бастама көтерілгеніне көңіл толатынын атап өтіп, іс жүзіндегі ынтымақтастықты одан әрі өрбітуге дайын екенін растады.
Айта кетейік, ертең Қазақстан — Бельгия іскерлік кеңесінің төртінші кеңесі өтеді.

JQ-Aqparat
Сурет: aqorda_resmi