Қар құрсауында қалып қойған адамдар құтқарылды

Қостанай облысында құтқарушылар көлігімен қарға малтыққан адамдарды шығарып алды, деп хабарлайды ҚазАқпарат облыстық ТЖД Мемлекеттік тіл және ақпарат тобына сілтеме жасап.

«Оқиға осы жылдың 2 ақпанында 01:25 сағатта «Қостанай — Әулиекөл» автожолының сегізінші шақырымында, Қостанай ауданы аумағында Осиновка кентінің маңында болған. ВАЗ 2110 маркалы жеңіл автокөлік жүргізушісі көлікті басқара алмай, жолдан шығып кетіп, қалың қарға кіріп кеткен. Автокөлік құралының салонында 3 адам болған. Оларға құтқарушылар көмекке келді», — дейді ведомствоның өкілдері. Құтқарушылар автокөлік аккумуляторын ажыратып, сүйрегіш тростың көмегімен автомобильді қар құрсауынан жолдың тазартылған учаскесіне алып шықты. Қазақстан Республикасы ІІМ ТЖК Солтүстік өңірлік аэроұтқыр жедел-құтқару жасағының қызметкерлері автокөліктің техникалық ақаулы күйде болғандығынан, оны жақын маңдағы елді мекенге қарай сүйреп апарды. Қазіргі уақытта құтқарылған азаматтардың өміріне еш қауіп жоқ.