Қаңтар оқиғасы: Алматыда қару-жарақ дүкенін тонағандарға қатысты сот үкімі шықты

Бас прокуратураның бірінші қызмет басшысының орынбасары Елдос Қилымжанов қаңтардағы тәртіпсіздіктер кезінде қару-жарақ дүкенін тонап кеткендерге қатысты үкімді жариялады, — деп хабарлайды Tengrinews.kz.

«Алматы қаласы Алмалы аудандық сотының үкімі бойынша, Оңтай мен Жеңісхан «Алпамыс» аңшылық дүкенінен қару ұрлағаны үшін кінәлі деп танылды. Сот оларды бес жылға бас бостандығынан айырды», — деді Қилымжанов ОКҚ брифингінде.

Оның айтуынша, лаңкестік әрекеттер мен тәртіпсіздіктерден бөлек, тонау, ұрлық, қару-жарақ ұрлау, құқық қорғау органдары қызметкерлеріне күш қолдану фактілері тексеріліп жатыр.

Осы санаттағы 162 айыпталушыға қатысты 101 қылмыстық іс сотқа жолданған.