Солтүстік Қазақстан облысындағы жергілікті құс фабрикасының жұмыртқасында сайлауға шақырған жазу пайда болды. Бұл оқиға қазір әлеуметтік желіде қызу талқыланып жатыр.
«Маусымның 9-ы бәріміз сайлауға қатысайық» деген жазбасы бар жұмыртқа суреті әлеуметтік желілерде тарап кетті. Өнім — «Фирма — Алекри» ЖШС-нікі. Директор Александр Прядконың айтуынша, мұндай белгі Нұр-Сұлтан қаласына көрмеге апару үшін санаулы данаға ғана басылыпты. «Парламент отырысында құс шаруашылығы мәселелері қаралды. Соған арнайы көрме әзірлейтін болдық. Біз ерекшеленейік деп шамамен 30-40 жұмыртқаға түрлі жазбалар бастық. Оның ішінде сайлауға шақырудан басқа «Алға, Қазақстан!» деген жазулар да бар. Бұл — жұрттың осынша қызығушылығын тудырады деп ойламаппын», — дейді кәсіпкер. Бұған дейін жұмыртқа бетінде 9-мамыр — Жеңіс күнімен құттықтаған жазбалар шыққан екен. «Әр мерекеде біз осылай жазамыз. Бірақ оны тек бірнеше данамен ғана шығарамыз. Туған-туыстарымызды, достарымызды құттықтау үшін», — дейді Александр Прядко. «Фирма Алекри» ЖШС өңірдегі ірі құс фабрикаларының бірі. Жылына 150 млн-ға дейін жұмыртқа шығарады. Өнімі негізінен экспортқа бағытталған. Қырғызстанға, Тәжікстанға, Ауғанстанға және негізгі бөлігін Ресейге сатады екен.
Дереккөзі: ҚазАқпарат