
«Реал» мен «Барселона» Испания кубогы жолындағы жарысты тоқтатты, деп хабарлайды «Хабар 24». Мадриттік клуб ширек финалда «Реал Сосьедадпен» жолыққан болатын. Қонақтар алға шығып, 56-минутқа дейін жауапсыз 3 гол соқты. Зидан баптайтын жігіттер қанша тырысқанымен, есе қайтара алмады. Қорытынды есеп: 3:4. Ал «Барселона» мен «Атлетика» арасындағы матчтың тағдыры ең соңғы минутта шешілді. Ойын аяқталарда Иньяки Уильямс мергендігімен көзге түсіп, өз командасына жеңіс сыйлады. Айта кетейік, «Барселона» бұған дейін 6 жыл қатарынан Испания кубогының финалында өнер көрсеткен болатын.