«Ингавирин» препаратын сатпақ болған алматылық ұсталды (видео)

Алматы тұрғыны құны миллион теңге болатын вирусқа қарсы «Ингавирин» дәрісімен ұсталды. Бұл туралы Tengrinews.kz хабарлады.

Қаржы министрлігі Қаржы мониторингі комитетінің Алматы қаласы бойынша Экономикалық тергеу департаментінің қызметкерлері «Ингавирин» дәрілік затын қаптамасына 7 500 теңге жоғары бағамен сатумен айналысатын қала тұрғынын ұстады.

«Денсаулық сақтау министрінің бұйрығына сәйкес бұл препараттың шекті бағасы бір орамға — 5 640 теңге. Шара барысында қала тұрғыны жалпы сомасы 1 050 000 теңге болатын 140 орамды заңсыз сатуды жоспарлап отырғаны анықталды», — деді комитеттегілер.

Қазіргі уақытта сотқа дейінгі тергеу жүріп жатқаны айтылады.