Илон Масктың спутниктері БҚО тұрғындарын шошытты (Видео)

Батыс Қазақстан облысында Ақсай қаласының тұрғындары америкалық Илон Маск SpaceX корпорациясы орбитаға шығарған ғаламдық интернет жүйесіне арналған 60 Starlink спутнигінің ұшырылғанына куә болды, деп хабарлайды Stan.kz.

Қала тұрғыны Светлана Соловьева аспанда белгісіз шарлар қозғалған уақытта ол құрбысымен бірге аулада болғанын атап өтті.

«Түнгі сағат он жарымдар шамасында біз аспанда жарқыраған шарларды көрдік. Олар екі қатарға орналасып, әрқайсысында 30 данадан болып, Оралдан Ақтөбеге қарай бағытта жылжып кетті», — деді ол «Мой город» басылымына.

Куәгерлер шарлар пайда болып, кенеттен жоғалып кеткенін атап өтті. Алайда не болып жатқанын бақылап отырғандардың бірі аспандағы шарлардың қозғалысын камераға түсіріп үлгерді.

Кейінірек Ақсай қаласының тұрғындары өз қалаларының үстінде НЛО емес, американдық миллиардер Илон Маскқа тиесілі SpaceX американдық корпорациясы орбитаға шығарған ғаламдық интернет жүйесінің 60 Starlink спутнигі ұшқанын білді.

Жоба сәтті жүзеге асырылған жағдайда, жоғары жылдамдықты Интернет әлемнің қазір қол жетімсіз бөліктерінде пайда болады. Илон Маск орбитаға 12 мың спутник шығаруды жоспарлап отыр.