Головкин Альварестен кейінгі жекпе-жегін Қазақстанда өткізуі мүмкін

Ағымдағы жылы 5 мамырда АҚШ-тың Лас-Вегас қаласында Геннадий Головкин мексикалық боксшы Сауль Альвареске қарсы реванш өткізеді. Осы жекпе-жек сәтті аяқталса, GGG келесі айқасын туған жерінде өткізуі әбден мүмкін.

Головкиннің промоутері Том Леффлердің айтуынша, өткен жылы Астанадағы ЭКСПО аясында үлкен бір бокс кешін ұйымдастыруға қатысты жоспар болған. Алайда уақыт тығыз болды. «Иә, былтыр жазда біз ЭКСПО аясында жекпе-жек өткізуге жақын болдық. Бірақ наурыз айындағы Дэнни Джейкобс пен қыркүйектегі «Канелоға» қарсы жекпе-жектердің арасы тым тығыз болды. Бас кезінде Билли Джо Сондерспен кездесеміз деген жоспар болған. Енді, Синко де Майода (5 мамыр — мексикалықтардың мерекесінде) бәрі жақсы болады деп сенеміз. «Канело» барлық тесттерді тапсырып, алдағы жекпе-жек ойдағыдай өтеді деген үміт бар. Әрине, Геннадийді Қазақстанға апарып, сол жерде үлкен бір айқасты ұйымдастырсақ, тамаша болатын еді. Ол жақта жекпе-жекті 40 мың адам сиятын футбол стадионында жасауға болады», — деді Леффлер Periscope-трансляцияда. Осы орайда Т.Леффлер Астанадағы футбол стадионын АҚШ-тың «StubHub Center»-мен салыстырды. «StubHub Center-мен салыстырғанда ол стадионның шатыры жабылады (күлді)», — деп атап көрсетті промоутер.

ҚазАқпарат