Елордадағы жарылыстан тағы бір адам қайтыс болды

Нұр-Сұлтан дәмханасында жарылыс кезінде зардап шеккен бір адам көз жұмды. Тағы екеуінің жағдайы ауыр. Бұл туралы қалалық денсаулық сақтау басқармасына сілтеме жасай отырып Tengrinews.kz хабарлады.

«Бастапқыда ауруханаға өте ауыр жағдайда түскен науқас жансақтау бөлімінде қайтыс болды. Науқаста ми және жұлын зақымы болды. Ауруханаға түскен сәттен бастап науқасты №2 көпсалалы қалалық аурухана мен Ұлттық нейрохирургия орталығының мамандары қарап шықты.

Алайда барлық жүргізілген емдеу шарасына қарамастан, науқасты аман алып қалу мүмкін болмады», — деді қалалық қоғамдық денсаулық сақтау басқармасының баспасөз хатшысы Әйгерім Ардаққызы.

Оның айтуынша, жансақтау бөлімінде тағы екі адам жатыр. Қалған науқастар аурухананың бейінді бөлімшелерінде ем алып жатыр. Олардың жағдайы тұрақты.