Елорда тұрғыны Ashyq үшін әуежай қызметкеріне шабуыл жасады

Елордада белгісіз біреу Нұрсұлтан Назарбаев халықаралық әуежайының қызметкеріне шабуыл жасап, жол талғамайтын көлікке мініп қашып кетті.

Бұл туралы Нұр-Сұлтан әуе айлағының баспасөз хатшысы Әнуар Шалекенов айтты, деп хабарлады Tengrinews.kz. Оның айтуынша, оқиға 19 мамырда болған. Тәртіп бұзған адам әуежай ғимаратына Ashyq жүйесі арқылы кіруден бас тартқан. Әуежайға ол жолаушыны күтіп алу үшін келген.

«Ол Ashyq арқылы тексеруден өтпестен ғимаратқа кіргісі келді. Бірақ оны авиациялық қауіпсіздік қызметкері тоқтатты. Ер адам маска тақпаған және қызметкерге қол көтерген. Кейін ол қымбат жол талғамайтын көлігіне отырып қашып кетті. Әуежай қызметкерлері желілік полиция бөліміне арыз түсірді. Көп ұзамай тәртіпбұзушы табылды», — деді Шалекенов.

Ер адам ұсақ бұзақылық жасағаны үшін әкімшілік жауапкершілікке тартылатыны айтылды. Әуежай баспасөз қызметі күтіп алушыларға, шығарып салушыларға және барлық жолаушыға ғимаратқа кіру тек Ashyq қосымшасы арқылы жүзеге асырылатынын ескертті.

24.kz