Елбасыға «Құрметті сенатор» төсбелгісі табысталды

Сенатта Қазақстанның тұңғыш президенті – Елбасы Нұрсұлтан Назарбаевқа «Құрметті сенатор» төсбелгісі мен куәлігі табыс етілді. Бұл туралы Sputnik Қазақстан хабарлады.

Бүгін Нұрсұлтан Назарбаев сенатқа келді. Депутаттар тұңғыш президентті ду қол шапалақпен қарсы алды. Сенат төрағасы Дариға Назарбаева өз сөзінде бүгін сенат тарихында ерекше күн екенін атап өтті.

«Аса мәртебелі Нұрсұлтан Әбішұлы, «Құрметті сенатор» мәртебесін беру туралы шешім сіздің жасампаз еліміздің іргетасын қалаудағы, әлем мойындаған стратегиялық дамуының дара жолын айқындаудағы кемеңгерлік қызметіңізге және кәсіби қос палаталы парламентті қалыптастырудағы орасан зор еңбегіңізге сенаторлардың терең құрметі деп қабылдаңыз», — деді Назарбаева.

Дариға Назарбаева «Құрметті сенатор» мәртебесі туралы ережеге сәйкес арнайы төсбелгі мен куәлікті сенат атынан тапсыру өзіне жүктелгенін айтып, Елбасыға салтанатты түрде табыс етті.