Достықта жоқ шекара

«Дос жүрегін шекара бөле алмайды». Осындай тақырыппен Атырауда VІ халықаралық фестиваль өтті. Бұл туралы Jasqazaq.kz хабарлады. 

Стратегиялық маңызы зор шараға Тәуелсіз Мемлекеттер Достастығы кеңістігіндегі Әзербайжан, Грузия, Ресей Федерациясына қарасты Қалмақ, Дағыстан Республикалары мен Самара, Астрахан облыстарынан арнайы делегациялар келіп қатысты. Сондай-ақ, еліміздің Қостанай, Қарағанды, Маңғыстау, Батыс Қазақстан өңірлері және жергілікті Атырау облысы бойынша еңбек етіп жүрген этномәдени бірлестіктердің өкілдері қатысты.

Фестиваль аясында облыс орталығындағы Махамбет атындағы қазақ драма театрында концерттік бағдарлама көпшіліктің назарына ұсынылды. Жиырмаға жуық шығармашылық ұжым бойынша 140-қа тарта өнерпаз қатысқан салтанатты шараны атыраулықтар тегін тамашалау мүмкіндігіне ие болды.

Айта кетелік, халықаралық шараны Атырау облысы Қазақстан халқы Ассамблеясы мен «Қоғамдық келісім» мекемесі ұйымдастырды.