Дәрігерлер үш жасар баланың өмірін құтқарды

Шымкентте  дәрігерлер марганцовка ішіп қойған 3 жасар баланың өмірін аман алып қалды. 
Химиялық сұйықтық ішіп қойған үш жасар бала сегізінші тамыз күні ауыр халде Т.Орынбаев атындағы гипербариялық оксигенация орталығына жедел жәрдеммен жеткізілген. Марганцовка ішіп қойған бүлдіршіннің ауыз қуысы толықтай күйіпті.  Химиялық күйік шалған  баланың өмірін аман алып қалу үшін дәрігерлер шұғыл түрде жансақтау бөліміне жатқызып, реанимациялық көмек көрсетті.
Анасының сөзінше,  балақай үйде ойнап жүріп бір  құтыдағы марганцовканы ішіп қойған.
Дәрігердің айтуынша, улы сұйықтық ішіп қойған бала  ауыр дәрежедегі токсикалық әсер алған. Жансақтау бөлімінде көрсетілген үздіксіз емнің арқасында  бүлдіршіннің денсаулығы  жақсарып, палатаға ауыстырылды. Қазір үш жасар бала  токсикологиялық бөлімшеде ем алуда.

Мамандар «Он жыл бұрын ішкі құрылысы күйген балалардың 80 пайызын өлім аузынан аман алып қалу қиынның қиыны еді дейді. Бүгінде медицинаның қарыштап дамуына сәйкес, ондай жағдайға тап болған бүлдіршіндердің өмірін сақтау қалуға мүмкіндік көп екен. Десе де, ол ата-ананың бала алдындағы жауапкершілігін  төмендетпеуі тиіс», – дейді.