Дархан Қыдырәлі: Пресс-карта журналистің құқықтық мәртебесін айқындап, артықшылықтар береді

11 ақпан 2023, 23:48

Ақпарат және қоғамдық даму министрі Дархан Қыдырәлі қазір талқыланып жатқан Масс-медиа туралы заң жобасына қатысты айтылып жатқан түрлі пікірлердің болуын табиғи құбылыс деп есептейді. Министр бұл туралы “Қазақстан” Ұлттық арнасындағы “Бас тақырып” бағдарламасына берген сұхбатында мәлімдеді.

Дархан Қыдырәлі қолданыстағы қазіргі заң қабылданған 1999 жылдан бері ақпарат кеңістігінде түбегейлі өзгерістер болғанын айта келе, орынды әрі сындарлы ( конструктивті) сынды қабылдайтынын атап өтті және Мәжілістің Жұмыс тобына қатысуға шақырды.

Дархан Қыдырәлі, сондай-ақ, заң жобасында көзделген пресс-картаның өзге елдердің тәжірибесінде бұрынан бар екенін тілге тиек етті. Министрдің айтуынша, пресс-карта журналистің құқықтық мәртебесін анықтап, әлеуметтік жәрдем алуға септігін тигізеді. Ал пресс-карта алғысы келмеген журналистер бүгінгідей қалыпты жалғастыра береді.

JQ- Ақпарат