Бюджеттің 310 миллиарды қалай болса солай жұмсалған

Бюджеттің 310 миллиард теңгесі қалай болса солай жұмсалған. Шенеуніктер дағдарыстағы жағдайды жақсартуға бағытталған қомақты қаржыны тиімсіз жаратыпты. Осындай қорытынды шығарған Есеп комитеті әсіресе жұмыспен қамтудың жол картасы бағдарламасынан көп шикілік тапқан. Бұл туралы КТК телеарнасы хабарлады.

2020-2021 жылдарға арналған жұмыспен қамту бағдарламасында мынадай кемшіліктер кеткен:

Мемлекеттік тапсырысты жүзеге асыратын компаниялардың міндеттері анық көрсетілмеген.

Келісім-шарттың 8 пайызы дұрыс рәсімделмепті.

Бағдарлама аясында жұмыспен қамтылғандар ары кеткенде 1-2 ай ғана жұмыс істеген.

34 пайызында зейнетақы аударымдары атымен жоқ.

Мердігерлердің әлеуметтік жауапкершілігі қарастырылмай, елдімекендердің абаттандырылуы ақсап тұр.

310 миллард теңге тиімсіз жұмсалса, соның тек 146 милларды қазынаға қайтарылыпты. Мониторингтік топ жалпы 2 триллион 200 миллиард теңге бюджет қаржысының жұмсалуын тексеріп шыққан. Нәтижесінде 72 дерекке қатысты іс құқық қорғау органдарының қарауына жіберіліп, 339 іс бойынша 196 адам әкімшілік жауапкершілікке тартылған. Агроөндірістік кешенді дамыту бағдарламасында да 49 миллард теңге сауатсыз жұмсалыпты. Компаниялар бюджет қаржысын еш негізсіз жұмсаған, ал жергілікті атқарушы билік жобалардың жүзеге асуын қадағаламаған.