Браконьерлерден 11 тонна балық тәркіленді

Алматы облысында заңсыз балық аулаушылар көбейіп барады. Аймақтағы құқық қорғау саласының қызметкерлері биыл браконьерлерден 11 тоннадан астам балық тәркілеген.

Мемлекетке де едәуір шығын келді. Прокурорлардың айтуынша, өңірде браконьерлік әрекет кәсіби сипат алып бара жатқан сыңайлы. Заңсыз балық аулайтындар арнайы киімдер киіп, жылдамдығы жоғары катерлерді пайдаланатын болған. Сондай-ақ, олар Қытайда жасалған торларды қолданады.

Бұл да жығылғанға жұдырық іспетті, балықтың уылдырық шашуына және көбеюіне кедергісін келтіреді.

Ерлан Мұстафин, облыстық прокуратураның басқарма прокуроры: — Прокурорлық ықпал ету актілерін қарау барысында 16 тұлға әкімшілік жауапкершілікке тартылып, 11 тоннадан астам балық өнімі мемлекет пайдасына өндірілді. 3 дерек бойынша сотқа дейінгі тергеп, тексеру жұмыстары ішкі істер басқармасымен жүргізілуде.

24.kz