Бір үйде 5 бала жанып кетті

Астанада жеке үйлердің бірінде болған жойқын өрт салдарынан 5 бала қаза тапты, деп хабарлайды ҚР ішкі істер министрлігінің төтенше жағдайлар комитеті.

Қайғылы оқиға дүйсенбіге қараған түні болыпты. Сарыарқа ауданы Шыңғыстау көшесінде орналасқан «времянкада» түнгі үште өрт шыққан. Көп ұзамай уақытша салынған баспананың шатыры қирапты. Тілсіз жау туралы хабар өрт сөндіру қызметіне 03.24 кезінде жеткен, өрт сөндірушілер жалынды бір сағаттан соң сөндірді. Жанып кеткен үйден 2006, 2008, 2013, 2015 және 2018 жылдары туған балалардың денесі табылған.

Олардың ата-анасы төтенше оқиға кезінде жұмыста болыпты.

Өрт аумағы – 30 шаршы метр, жалынды сөндіруге 17 өрт сөндіруші мен 5 көлік қатысқан, бұдан бөлек төтенше жағдайлар комитетінің орталық өңірлік аэромобильді жедел құтқару жасағынан төрт адам мен бір көлік жұмылдырылған.

 sputniknews.kz