
Бекболат Тілеухан енді мәжіліс депутаты емес. Бүгін парламент мәжілісінің жалпы отырысында оның өкілеттілігін мерзімінен бұрын тоқтату туралы шешім қабылданды. Халық қалаулысы жауапты қызметтен өз еркімен бас тартыпты. Әріптестері оны марапаттап, қошеметпен шығарып салды.
Нұрлан Нығматулин, Мәжіліс төрағасы:
— Әріптесімізге бірлескен жұмысымыз үшін алғыс білдіріп, алдағы уақытта да зор денсаулық, жаңа қызметте табыс тілейміз. Құрметті әріптестер арнайы дайындаған алғыс хатымыз бар. Соны тапсыруға рұқсат етіңіздер.
Бекболат Тілеухан 2004 жылғы Мәжілістің үшінші шақырылымынан бастап төрт мәрте депутат боп сайланған. Оған дейін Президент оркестріне жетекшілік еткен. Енді Бекболат Тілеухан Бүкіләлемдік этноспорт федерациясының вице-президенті қызметін атқарады. Экс-депутат Қазақстанның ұлттық спорт түрлері қауымдастығының да президенті болған. Ал халықаралық ұйымға Қазақстан 2019 жылдан бері толық мүше. Штаб-пәтері Түркияның Стамбұл қаласында орналасқан. Экс-депутат енді Нұр-Сұлтан, Стамбұл, Бакудың арасын жол қылып үш мемлекетте қатар жұмыс істейтінін мәлімдеді. «Парламенте жақсы жылдарым өтті» деген ол жаңа қызметке әбден ойланып-толғанып барып ауыстым дейді.
Бекболат Тілеухан:
— Ойланып істелген нәрсе ғой. Табанасты кеше, бүгін шешілген нәрсе емес. Қаншама ойландым. Жалпы анау енді түрік парламенті ассамблеясы кезінде болды ғой. 27-қыркүйекте. Сол кезде осындай ұсыныс келді. Шешімге сол кезде келдім.
Ktk.kz