Бейжіңде мектеп оқушылары қазақтың күйін сүйсіне тыңдап жүр

Қытай астанасы Бейжіңдегі мектептерде оқушылар қазақтың күйін сүйсіне тыңдап жүр. Белгілі әнші Димаш Құдайберген Инстаграмға осындай видео жариялады, деп хабарлайды ҚазАқпарат.

«Кішкентай балалар «Бастау» атты жеке концертімде мен орындаған «Адай» күйін тыңдап жүр. Видео Бейжің қаласындағы орта мектепте түсірілген. Бақытты болыңдар! Музыканың тілі баршаға түсінікті!», — деген пікір қалдырды Димаш.

Еске сала кетсек, Қытайда өткен I’m a Singer-2017 халықаралық ән байқауында екінші орын алған Димаш Құдайберген Қытай халқының ерекше қошеметіне бөленген болатын. Ал жазда Бейжіңде өткен Азияның жаңа әндері фестивалінде (2017 Fresh Asia music Festival) «Шетелдің үздік шығармашыл тұлғасы» аталымында жеңімпаз атанды.

Димаш Құдайбергеннің Қазақстандағы тұңғыш жеке концерті «Бастау» 2017 жылғы 27 маусымда өтті. Сол кеште талантты әншінің өнерін тамашалауға еліміздің түкпір-түкпірінен, алыс-жақын шетелдерден 30 мыңнан астам адам ағылып келді. Қонақтардың көпшілігі Ресей мен Қытайдан екендігін айта кеткен жөн.