Бейіт басында кәуап пісірген адамдардың видеосы тарады

«Ішкі істер органдары жазған арыздарымды қараусыз қалдырды. Егер өліктердің ортасында кәуап пісіріп, тамақ ішіп, жынойнақ жасап жатсақ, мұсылман болып не үшін жүрміз?» — дейді Сандуғаш Дүйсенова.
Талдықорғанда бір топ азамат зираттардың ортасында кәуап пісіріп жүр. Бейіт басында осындай әрекет жасаған бейтаныс адамдардың видеосы желіге тарап, халықтың ашуын туғызды. Ең сорақысы, бейіт басын демалыс орнына айналдырып, кәуап дайындағандар бейнежазба бар болса да, кінәләрін мойындағысы келмейді. Ал полиция қызметі бастапқыда істі қысқартып тастап, видео желіге тарап, халықтың наразылығын тудырғаннан кейін қайта іс қозғапты, деп хабарлайды 31 арна.

Зираттың тазалығына жауапты Сандуғаш Дүйсенова екі моланың ортасында түтіндетіп, кәуап дайындап жатқандарды көргенде ашуға булыққан. Оның айтуынша, кәуап пісіргендер бейіт маңына зират алдындағы шлагбаумның құлпын сындырып кірген.

«Ішкі істер органдары жазған арыздарымды қараусыз қалдырды. Егер өліктердің ортасында кәуап пісіріп, тамақ ішіп, жынойнақ жасап жатсақ, мұсылман болып не үшін жүрміз?» — дейді Сандуғаш Дүйсенова.

Ал зиратта бұрыннан бері тас орнатумен айналысамын деген азамат кәуап пісірмегендерін, ештеңені сындырмағандарын айтып, барлығын жоққа шығарды.
Сандуғаш Дүйсенова бейіт басындағы ұрлық пен вандализмге тосқауыл қою мақсатында зираттың кіре берісіне шлагбаумның жақында орнатылғанын айтады.

Алматы облыстық полиция департаменті бейіт басындағы шлагбаумды сындырғандардың үстінен бөтеннің мүлкін қасақана жою немесе бүлдiру бойынша қылмыстық іс қозғалып, сот алды тергеу басталғанын хабарлады.

sn.kz