Бас прокурора: Қаңтар оқиғасымен ұсталғандардың құқығын бұзу бойынша 133 қылмыстық іс қозғалды

Бас прокурордың орынбасары Ерлік Кененбаев қаңтар оқиғасына балйанысты ұсталғандардың құқығын бұзғандардың үстінен неше іс қозғалғанын айтты.

«Заңсыз іс-әрекеттер, оның ішінде азаптаулар тергеудің бастапқы кезеңінде болады. Адамдарды оқиға орнынан полицияға апарған соң олар тергеушімен немесе жедел уәкілмен оңаша қалады. Жедел қызметкерлер ұсталғандармен «жүрекжарды әңгіме» жүргізу үшін процессуалдық сипаттан тыс қарым-қатынастарға жол береді. Ұсталғандардың көбі өз құқықтарын білмейді, қорғаушы талап етіп жатпайды. Полиция бұл жайтты көп жағдайда өздеріне пайдаланады. Себебі ұсталған адамдармен жұмыс жүргізудің нақты реттелген тәртібі жоқ. Қаңтардағы оқиғалар бұған айқын дәлел», — деді Бас Прокурордың орынбасары. Сондай-ақ ол қаңтар оқиғасы бойынша прокуратура органдарына түскен шағымдардың қалай қаралып жатқанын баяндады. «12 қаңтарда Алматы прокуратурасы заңсыз қамауда отырған қаланың 24 тұрғынын босатты. Аталған факті бойынша арнайы прокурор тергеу жүргізуде. Прокурорлар уақытша ұстау изоляторларынан негізсіз ұсталған 96 адамды босатты. Сонымен бірге әрекеттерінің ауыр болмауына байланысты 92 адамды бұлтартпау шарасы өзгертілді. Ұсталған адамдарға қатысты құзыретті асырып пайдалану, өлім, азаптау фактілері бойынша істер тергеліп жатыр. Бұл сипаттағы 133 қылмыстық іс тергелуде. Барлық істердің обьективті өтуі үшін процессуалдық прокурорлар белгіленді. Ұсталған тұлғаларға медициналық көмек қамтамасыз етілді. Қазіргі таңда қамауда отырған және ұсталған 27 адамға қажетті медициналық көмек көрсетіліп отыр» -деді Ерлік Кененбаев.