Барымташылар мал ұрлығына әйел жүргізушілерді жалдаған

Ақтөбе облысында мал ұрлығымен айналысқан барымташылар тобы ұсталды. Олар жайылымда жүрген жылқы мен сиырға қырғидай тиген. Күдікке ілінбес үшін көлік айдауға әдейі әйел жүргізушілерді жалдаған. Бұл туралы КТК телеарнасы хабарлады.

— Жалпы осы жерге ұрлыққа келе жатқаныңды білдің бе?

— Иә, білдім.

— 95 мың теңге ақшаны бергені ұрлықа қатысып, малды апарысқаның үшін берді ме?

— Такси ретінде мені жалдайды.

Барымташылардың қылмысын осы таксиші келіншек жайып салды. Сегіз адамнан құрылған топқа бір жұдырығы жоқ «Шолақ» деген лақап аты бар жігіт басшылық еткен. Олар Қобда, Ойыл мен Алға аудандарының жайылымдарын бұрынан торуылдап жүрген. Әзірге тек 5 рет мал ұрланғандары дәлелденді. Соңғы рет Ойыл ауданында жайылымдағы буаз сиырлардың қарнын жарып, сойып алған. Бұзау өлекселерін сол жерге лақтырып кетеді. Осыдан екі апта бұрын малынан айрылған ойылдықтар шағымданған еді. Енді олар төрт түлігінің құнын осы ұсталған күіктілерден өндіре алады. Қазір барымташылар тобының жетекшісі қамауда отыр. Қалғандары тергеу біткенше қолхатпен бостандыққа жіберілген.