Балаларды биік шатырға шақыратын қауіпті ойындар пайда болды

Көкшетау педагогтары әлеуметтік желіде қауіпті ойынның пайда болғанын айтып, ата-аналарға сақ болуды ескертті, деп хабарлайды ҚазАқпарат.

«Кәмелеттік жасқа толмағандар арасындағы үлкен әлеуметтік мәселе — әлеуметтік желідегі қауіпті ойындарға назар аударуларыңызды сұраймыз. Мұндай ойындардың әкімшілері балаларды жабық топқа шақырады және өліммен аяқталатын түрлі флешмобтарға қатысуға шақырады», — делінген Көкшетаудың барлық мектептерінің сайтында жарияланған үндеуде. Ескертуде айтылғандай, баланың қауіпті ойынға арбалуының алғашқы белгілері — өліммен байланыстырылатын қара және күңгірт түсті киімдерді таңдауы; денесінде күю, кесу және өзге де зақым белгілерінің пайда болуы; үйдегі девайстарға қолжетімділікті шектеу, компьютерлерге кілт сөздер қою. Сондай-ақ, балалардың әлеуметтік желіде депрессияға толы жазбалары мен өз бетін жауып түскен суреттерді жариялауы да суицидтік ойлардан хабар береді. Одан бөлек, WhatsApp желісі бойынша кейбір мектеп директорлары ата-аналарға балалар үшін қауіпті ойындардың пайда болғанын жеткізген. Сондай ойындардың бірі — жасөспірімдердің көпқабатты үйлердің шатырында жүгіруді талап еткен Instagram-дағы үздік бейнеролик байқауы. «Қазіргі балалардың бәріне интернет қолжетімді. Әрбір ата-ана баласының немен айналысып жүргенін, қандай сайттарға кіретінін білуі тиіс. Қазір Instagram-да көпқабатты үй шатырында бейнеролик түсіру байқауы жүріп жатыр. Балалар көбірек лайк жинау үшін түсірілім жасап жүр. Біз ата-аналармен тұрақты жұмыс жүргізудеміз және көмектесуге әрқашан дайынбыз», — деп жауап берді ҚазАқпарат тілшісіне Көкшетау №1 мектеп-гимназиясының психологы Динара Иманбаева. Бұған дейін Көкшетаудағы көпқабатты үйлердің шатырында жүрген жасөспірімдер бейнесі әлеуметтік желіде жарияланған болатын. Полиция жасөспірімдердің аты-жөнін анықтап, түсіндірме жұмыстарын жүргізді.