Автобус жүргізушісі Алматыға жолаушы тасымалдамақ болған

Түркістанда қаларалық автобус жүргізушісі карантин режиміне қарамастан жолаушыларды жинап, Алматы қаласына заңсыз сапарға шыққан.

Облыстық жолаушылар көлігі және автомобиль жолдары басқармасының ұйымдастыруымен бұл көлікке тосқауыл қойылып, құзырлы органдар тиісті шара қолданған. Сала мамандары жолаушылар тасымалы қызметімен айналысатын жүргізушілерге автобустардың облыс аумағынан шығарылмайтынын ескертті.

Бұл мақсатта Сауран және Шақпақ блокпостарында тосқауыл қойылған. ҚР Президентінің жарлығына сәйкес, елімізде төтенше жағдай жарияланып, карантин режимі енгізілген болатын. Бүгінде төтенше жағдай режимі аяқталғанымен, карантин күшінде қалып отыр.

Бұл ретте Түркістан облысы аумағындағы көлік нысандарының (теміржол вокзалдары, автовокзалдар, автобекеттер) қызметтері уақытша тоқтатылған.

Сонымен қатар, халықаралық, республикаішілік бағыттар бойынша қоғамдық көліктер мен жолаушылар тасымалымен айналысуға тыйым салынып отыр.

ҚазАқпарат