Қостанай облысында қасқыр адамға шабуыл жасады. Бұл туралы Qostanai.Media сайтына сілтеме жасап Tengrinews.kz хабарлайды.
Оқиға 24 желтоқсанда Наурызым ауданы Қарамайшы кентінде болған. Жыртқыш жеке үйдің ауласына келіп, 40 жастағы ер адамға шабуыл жасаған. Ауыл тұрғындарының бірі оқыс жағдайдың алдын алып үлгерген. Ол айқайлаған дауысты естіп, үйден жүгіріп шығып, балтамен қасқырды өлтірген.
Қазір Қарамайшы тұрғыны аудандық ауруханада, дәрігерлердің бақылауында. Оның денсаулығына төніп тұрған қауіп жоқ. Ал қасқыр облыстық орталыққа сараптамаға жіберілгені белгілі болды.