Әуе компаниясы ұшу алдында жолаушылардың салмағын өлшейді

Бұл процедура тек қана жолаушылардың келісімімен жүзеге асады, деп хабарлайды Baq.kz.

Finnair әуе компаниясы қарашадан бастап ұшу алдында жолаушылардың салмағын өлшейді. Сондай-ақ, эксперимент барысында жолаушылардың жүгі туралы мәлімет жинау жоспарланып отыр. Осылайша, әуе компаниясы ұшаққа түсетін нақты салмақты есептеп көрмек.

Салмағына қатысты ақпаратты жолаушының өзі ғана біледі, компанияның мәліметтер базасында бұл деректер анонимді болады.

Finnair компаниясының мәліметі бойынша, адамдардың салмағы киіммен бірге жыл мерзіміне байланысты әртүрлі болады, сонымен қатар, туристер мен бизнес-саятхатшылардың жүгінің салмағында да айырмашылық бар.

Еуропа авиациялық қауіпсіздік агенттігінің 2009 жылдағы мәліметі бойынша, ер адам мен оның қол жүгінің салмағы орташа есеппен 88 келі деп саналса, әйелдер – 70 келі, 12 жастағы бала – 35 келі.