Атырауда карантин режимі жеңілдеді

Індетке шалдыққандар көрсеткішінің төмендеуіне байланысты қала маңындағы блок-бекеттер де алынды, деп хабарлайды «Хабар 24».

Бүгіннен бастап жалпы көлемі 2 мың шаршы метрден асатын ірі сауда орындары, ойын-сауық орталықтары, сауналар мен моншалардың қызмет көрсетуіне рұқсат берілді. Әуежай мен теміржол вокзалының және автобекеттің жұмысы жанданып, такси қызметі де іске қосылды. Ал 3 маусымнан бастап базарлар мен азық-түлік емес сауда орындары санитарлық талаптарды қатаң сақтай отырып, қызмет көрсете бастайды. Айта кетейік, маска тағу режимі және ара қашықтық сақтау секілді қауіпсіздік шаралары өзгеріссіз қалады. Сондай-ақ бұқаралық және спорттық іс-шараларға, түнгі ойын-сауық нысандарының жұмысына салынған тыйым да өз күшінде.

Амантай Жұмағалиев, облыстық тауарлар мен көрсетілетін қызметтердің сапасы мен қауіпсіздігін бақылау департаменті басшысының орынбасары:

– Өздеріңіз білесіздер, ол жерде адам көп шоғырланған. Сондықтан ауру таралу қаупі кәсіпорын, мекемелерде, базарларда жоғары. Блок-посттар карантин жарияланған елді мекендерде сақталады. Ол Жылыой ауданында, Теңіз кен орнында, Мақат ауданының Мақат ауылында.