
Арыс тұрғындары бір ай ішінде 100 мың теңгеден алады, — деп хабарлайды Tengrinews.kz тілшісі Түркістан облысы әкімінің кеңесшісі Сәкен Қалқамановқа сілтеме жасап.
«Арыс қаласының әрбір тұрғынына бір ай ішінде 100 000 теңге аударылады. Арыс қаласындағы кәсіпкерлерге 1 пайызбен 5 000 000 теңге несие беріледі. Арсенал 2 апта ішінде қаладан көшіріледі», — деп жазды Қалқаманов Facebook желісіндегі парақшасында.
Арыс қаласындағы жарылыстан зардап шеккен халықтың жай-күйімен танысуға ҚР Премьер-министрі Асқар Мамин арнайы келді. Бұл туралы Түркістан облысы әкімінің баспасөз қызметіндегілер хабарлады. Премьер-министр облыс басшысы Ө.Шөкеевпен бірге снарядтан зақым келген тұрғын үйлер мен 4 қабатты қалалық аурухананы, халыққа қызмет көрсету орталығын және Көктем шағынауданындағы И.Журба атындағы орта мектепті аралап, ғимараттардың жай-күйімен танысты. Сонымен қатар, күні кеше үйлеріне оралған арыстықтармен сөйлесіп, оларға тиісті көмек көрсетілетінін жеткізді.
Содан кейін Премьер-министр Арыс қаласына берілуі тиіс көмекті талқылау мақсатында үкіметтік комиссия отырысына қатысты. Жиналыста Асқар Мамин Арыста тұратын әрбір тұрғынға, яғни 44 781 азаматқа Үкіметтен 100 мың теңгеден берілетінін айтты. Сондай-ақ, қала 1 ай көлемінде толық жөндеуден өтетінін жеткізді. Бұдан өзге, арыстық кәсіпкерлерге 1 пайызбен 5 миллион теңгеге дейін жеңілдетілген несие берілетінін болды. Сонымен қатар, Үкімет басшысы Арыс қаласында жаңа аурухана салынып, 4 мыңнан астам бала жазғы демалысқа баратынын баяндады. Ең бастысы, қаладағы әскери арсенал 2 аптада басқа аймаққа көшірілетіні жөнінде шешім қабылданды.