
Демократия отаны және cөз еркіндігі салтанат құрған ел деп есептелетін АҚШ-та полиция тікелей эфир жүргізіп тұрған CNN тілшісінің қолына кісен салды. Бұл туралы хабарлаған әлемдік ақпарат құралдары журналист Омар Жименездің Миннесота штатының Миннеаполис қаласында жалғасып жатқан көшедегі наразылық шарасы туралы репортаж жүргізіп тұрған сәтте қамауға алынғанын жария етті.
Омар Жименез полиция қолына кісен салып жатқанда өзінің журналист екенін, тікелей эфир жүргзізіп жатқанын ескертіп, мұның себебін сұраған. Бұған тәртіп сақшысы жауап бермей, тек «Қамауға алындыңыз» депті.
CNN телеарнасы өз тілшісінің қамауға алу барысын тікелей эфирден көрсетті. Айта кеткен жөн, осы репортажды түсірген оператордың қолына да кісен салынды.
Еске сала кетейік, Миннеаполис қаласындағы тұрғындардың жаппай наразылығына бір қаранәсілді азаматтың өлімінен кейін басталып еді. Полиция қызметкері оны тұтқындау барысында тізесімен біразға дейін тұншықтырғанда 46 жастағы Жорж Флойд «Дем ала алмай жатырмын» деп жалбарынған деседі. Ол жедел жәрдем апарған ауруханада жан тәсілім етті.

Келіп түскен соңғы дерекке қарағанда, Омар Жименез бен оның әріптестері босатылды.
Jas Qazaq — Aqparat