
Қырғызстандықтар 5 сәуірде алып қашқан 27 жастағы Айзада Қанатбекованың өліміне байланысты наразылық акциясына шықты. Бұл туралы Stan.kz хабарлады.
Айзада Қанатбекованы 5 сәуірде сағат 7:00-де Бішкекте алып қашқан. Бұл сәт бейнебақылау камераларына түсіп қалған. Видеода бір ер адамның қызға жақындағаны және оны күшпен машинаға апарғаны көрінеді. Кейінірек тағы екі ер адам қызға жақындап, оны қызыл түсті машинаға мәжбүрлеп отырғызған. Бұл көлікке екі адам отырады, үшіншісі таксигеотырады. Қыздың туыстары алып қашқандардың бірі қызды бірнеше рет «мазалағанын» айтты.
Жақында қыз бен оның алып қашқан жігіттің мәйіті бар көлік табылды.
«Қарындасымызды алып қашқан ер адамның есі дұрыс емес. Ол 30 жастан асқан. Біз одан бірнеше рет қарындасымызды мазаламауды сұрадық», — деді туысы.
Туыстарының бірінің айтуынша, қыздың анасы полицияға арыз жазғаннан кейін, оны іздеу үшін ешқандай шара қолданылмаған.
Полицияның алдын-ала мәліметтері бойынша, ер адам жанжал кезінде қызды қылқындырып, содан кейін өзіне пышақ жарақатын салып, өлген.
Осы жағдайға байланысты Бішкекте Ішкі істер министрлігі ғимаратының жанында «Зорлық-зомбылыққа қарсы» митингі өтіп жатыр. Митингке қатысушылар министрлік басшысы Ұлан Ниязбеков пен Бішкек ІІБ бастығы Бақыт Матмусаевтың отставкаға кетуін талап етуде.
Наразылық білдірушілерге Қырғызстан Республикасы Ішкі істер министрлігі тергеу қызметі қызметкерлерінің бірі шықты. Жиналғандар оны тыңдамай, министрдің келуін талап етті.
Митингке 200-ден астам адам жиналды.