Алматы көшелері қалың қардың астында қалды, деп хабарлайды ҚазАқпарат тілшісі Алматы қаласында 1 сәуірде таңертең жаңбыр жауып, соңы қарға ұласты.
Сағат 18:00-дегі жағдай бойынша тау етегіндегі аудандарға 10- 12 см , қалада 3- 5 см қар жауды. Қаланың жоғарғы бөлігінде көктайғақтың алдын алу үшін, қар жауғаннан бастап, жолдарға көктайғаққа қарсы материалдар себіліп, қар тазалануда. Қаланың орталық бөлігінде мұндай жұмыстар 17:00-де басталды. Тротуарларды, жаяу жүргіншілер аймақтарын, қоғамдық көлік аялдамаларын, автотұрақ қалталарын, жер үсті өткелдерін және ортақ пайдаланылатын жерлерді тазарту жұмыстары жүргізілуде. Қар тазалау жұмысына 491 техника бірлігі, оның ішінде 114 құмлақтырғыш жұмылдырылды. Мыңнан астам жұмыскер қазір көшелердегі қарды күреп жатыр. Көктайғаққа қарсы 430 тонна материал пайдаланылды. Түнгі уақытта 371 арнайы техника, оның ішінде 127 құмлақтырғыш, сондай-ақ 400-ге жуық жол жұмысшысы шығады деп жоспарланған. Аудандық әкімдіктер мен қала әкімдігінде қар тазалау жұмыстарын тәулік бойы бақылайтын кезекшілік ұйымдастырылған.