Алматыда үшем дүниеге келді

Алматыдағы Перинатология және балалар кардиохирургиясы орталығында жасанды жолмен ұрықтандыру (ЭКО) арқылы үшем дүниеге келді.

Алматы қалалық Қоғамдық денсаулық сақтау басқармасының мәліметінше, жүкті әйел кесар тілігі операциясы арқылы босанды. Ота сәтті өтті.

«Бірнеше минут айырмашылығымен дүниеге келген үш қыздың салмағы 2 келіден сәл асады. Салмағы аз болғандықтан нәрестелер бір тәулік бойы реанимация бөлімінде болып, кейін жаңа туған нәрестелер патологиясы бөліміне ауыстырылды. Онда олар 8 күн жатты. Осы уақыт ішінде нәрестелер дәрігерлердің бақылауында болды»,– деді ведомстводан.

Шала туылған нәрестелердің денсаулығын қадағалаған және оларды күткен дәрігерлердің кәсіби шеберлігінің арқасында анасы мен балалары үйіне шығарылды. Сондай-ақ, нәрестелерге күтім жасау, тамақтандыру бойынша кеңестер берілген. Қазір ана мен сәбилердің жағдайы жақсы. Айта кетейік, биылғы 6 айдың ішінде Перинатология және балалар кардиохирургиясы орталығына көп ұрықты 135 жүкті әйел келіп түскен, оның 4-еуі үшем болған.

ҚазАқпарат