Алматыда апатқа ұшыраған көліктің терезесінен бала ұшып кетті

Құлжа күре жолында жөндеу жұмыстары жүріп жатқан учаскеде ішінде екі ересек адам мен бала отырған көлік жол апатына түсті, деп хабарлайды Sputnik Қазақстан.

Құлжа күре жолында Рысқұлов даңғылы жаққа қарай келе жатқан Hyundai көлігінің жүргізушісі жөндеу жүріп жатқан жерге жақындағанда рөлге ие бола алмай қалған. Салдарынан көлік металл қоршауды бұзып, шұңқырға аударылып түседі. Жол апатынан машинаның ішінде отырған жеті жасар бала ұшып шығады.
Оқиға куәгерлерінің айтуынша, құрылыс нысанында ешкім болмаған, сондықтан бала жарты сағат бойы көмек іздеген. Жол жөндеушілердің бірін кезіктірген бала жағдайды айтып береді. Апат орнына жедел жәрдем, полиция мен құтқарушылар шақыртылған.

Төтенше жағдайлар департаментінің қызметкерлері көлік ішінде қыстырылып қалған ер адам мен әйелді алып шығу үшін есігін кесіп алады. Үшеуі де ауруханаға жатқызылды. Әйел адамның хәлі ауыр.