Алматы вокзалында жоғалып кеткен қыз ауруханадан табылды

6 қазанда Алматы-1 вокзалында жоғалып кеткен 28 жастағы Айжан Кенжеқараева табылды, — деп хабарлайды Tengrinews.kz тілшісі.

Қыздың әпкесінің айтуынша, ол қаладағы ауруханалардың бірінен табылды. «Біз эпилепсия болғанын білдік. Бей-жай қарамаған адамдар жедел жәрдем шақырып, оны ауруханаға жеткізген. Ол әлі ауруханада ем алып жатыр. Жақында шығады, үйге алып кетеміз. Аман-есен, оны іздестіргендердің барлығына алғыс айтамын», — деді әпкесі Әлия Кенжеқараева. Еске сала кетейік, осыған дейін 5 қазанда үйінен шығып кетіп, ұшты-күйлі жоғалған қыздың іздестіріліп жатқаны хабарланған болатын. Қыздың туыстарының айтуынша, 28 жастағы Айжан Кенжеқараеваны соңғы рет Алматыдағы 1-ші теміржол вокзалының маңынан көргендер болған. «Соңғы телефон қоңырауы 6 қазанда сағат 13.00-де болған, телефон түнгі 23.00-ге дейін қосулы болған, одан кейін байланыс үзілген. Содан бері оралмады, біз полицияға хабар бердік», — деген едіі әпкесі Әлия Кенжеқараева.