Алматы облысында ер адам әйелімен жанжалдан соң үйін өртеп жіберді

Алматы облысының 44 жастағы тұрғыны әйелімен жанжалдасып, өз үйін өртеп жіберді. Сотқа дейінгі тергеу басталды, деп хабарлайды Zakon.kz.

Алматы облысы ПД баспасөз қызметі:

15 ақпанда Талғар ауданындағы саяжайлардың бірінде үй өртенді. Өртке оранған ғимараттан әйел мен екі кішкентай бала қашып үлгерсе, отағасын шуға қарай жүгірген көршілер аман алып қалды.

Үйді өртеп жіберді деген күдікпен 44 жастағы отағасы ұсталды. Ол қылмысын мойындады. Ер адам әйелімен жанжалдан соң осындай әрекетке барғанын түсіндірді.

Алматы облысы ПД баспасөз қызметі:

ҚР Қылмыстық кодексінің 202-бабы «Бөтеннің мүлкін қасақана жою немесе бүлдіру» бойынша сотқа дейінгі тергеу басталды. Мұндай істер бойынша міндетті сараптамалар бүгінге белгіленді. Күдіктіге қатысты түпкілікті шешім тергеу аяқталған соң шығарылады.