Қалмұханбет Қасымов:Түрмедегі экстремистермен теологтар жұмыс істеп жатыр

Қазір Қазақстан түрмелерінде діни көзқарасына байланысты 400 адам отыр. Бұл жөнінде бүгін Парламент Мәжілісіндегі Үкімет сағатында ҚР Ішкі істер министрі Қалмұханбет Қасымов баяндады, деп хабарлайды jasqazaq.kz тілшісі.

Министр мырзаның айтуына қарағанда қамаудағы азаматтардың діни көзқарасын дұрыс бағытқа бұру үшін олармен арнайы теологтар жұмыс істеп жатқан көрінеді. «Иә, қазіргі уақытта бізде экстремизм, терроризм үшін сотталғандар бар. Колонияларда шамамен 400 адам ұсталып отыр. Әрине, оларға біз қамауда ұстаудың айрықша режимін қолданамыз. Бірақ, оларды дұрыс жолға қою үшін қылмыстық атқару жүйесінің штатына теолог мамандығын енгіздік. Жекелеген бірліктерді қысқарттық және біздің барлық колонияларымызда мұндай мамандар бар», – деді министр.

Қалмұханбет Қасымовтың айтуына қарағанда діни көзқарасына байланысты түрмеге түскен азаматтармен теологтар бұдан былай тұрақты жұмыс істемек. «Жақсы тәжірибе жолға қойылды. Нәтижелері де жаман емес. Меніңше, біз оны одан ары қарай дамытамыз. Әрине, біздер үшін бұл жаңа қызмет. Соған қарамастан одан ары дамыта береміз», – деді Қалмұханбет Қасымов.

Бейбіт Тоқтарбай

Астана