
Орта салмақта өнер көрсететін қазақстандық Жәнібек Әлімханұлы (8-0, 4 КО) нокаутпен жеңістен кейін Халықаралық бокс федерациясының (IBF) рейтингінде ТОП-15 тізімге енді, — деп хабарлайды Vesti.kz.
Соңғы жекпе-жегінде қазақcтандық боксшы АҚШ-тың Фресно қаласында канадалық Альберт Онолуносені (24-3-1, 8 КО) нокаутқа түсірген. Осылайша, Жәнібек орта салмақта WBC Continental Americas және WBO Global белбеулерін қорғап қалған еді. Бұл жетістік арқасында Әлімханұлы IBF рейтингіне кіріп, 15-орынға жайғасты. Бұл ұйымның чемпионы қазақстандық тағы бір боксшы Геннадий Головкин (40-1-1, 35 КО).