Ақтөбелік ерлі-зайыпты үй тонап жүрген жерлерінен ұсталды

Азаматтық некедегі бұл екеуі әккі ұры екен. Олардың ізіне тәртіп сақшыларының да түскеніне біраз болған. Енді қолдарында бұлтартпас айғақтары бар. Бұл туралы КТК телеарнасы хабарлады.

Ерлі-зайыптылар қаланың қақ ортасындағы үйлердің бірін тонап жатқанда полиция үстерінен түсіпті. Олар алтын бұйымдар мен ақшадан өзге ыдыс-аяқты да қапқа салып, арқалап шықпақ болған. Бірақ арам ойлары жүзеге аспады. Бұл екеудің бұрынан бірнеше үйді тонағаны белгілі болып отыр. Коммуналдық мекеме жұмысшысының формасын киген әйелі алдымен үйді тексеріп, кейін күйеуіне хабар береді екен. Қазір ерлі-зайыпты күдіктілер қамауда отыр.