
Ақтауда жол бойында жаппай төбелескендердің видеосы тарады, — деп хабарлайды Tengrinews.kz.
Видео кадрларынан бірнеше ер адам жерде жатқандарды күрекпен ұрғанын көруге болады. Оқиға автокөліктердің маңында болған.
Маңғыстау облыстық Полиция департаментінің баспасөз қызметі таратқан мәлімет бойынша, 2021 жылдың 4 қазанында шамамен сағат 16.30-да Ақтау қалалық Полиция басқармасының кезекші пультіне 6-ықшамаудандағы 37-үй маңында жаппай төбелес болғаны туралы хабар келіп түскен.
«Оқиға орнына жедел тергеу тобы аттанды. Төбелескендер ұсталып, Ақтау Полиция басқармасына жеткізілді. Жанжал ішімдік ішкеннен кейін тұрмыстық сипатта болғаны анықталды», — деді полициядағылар.
Бұл дерек ҚР Қылмыстық кодексінің 293-бабы («Бұзақылық») бойынша тіркелгені хабарланды. Тергеу жүріп жатыр.