АҚШ Ашық аспан келісімшартынан шығатынын мәлімдеді

АҚШ Ашық аспан келісімшартынан шығуға шешім қабылдады, деп хабарлайды «Хабар 24».

Бұған Ресейдің құжат шарттарын бірнеше рет бұзуы себеп. АҚШ Мемлекеттік хатшысы Майк Помпео осылай деп мәлімдеді. Мысалы, Ресей әскерилері келісім бойынша Америка мен Еуропаның аумағымен ұшып, бақылауды жоғары дәлдікті қаруын стратегиялық нысандарға бағыттауға пайдаланған. Ал америкалықтарға өзіндегі кей аудандардың үстімен ұшуға рұқсат бермеген. Бірақ осыған қарамастан Еуропаның бірқатар елі Вашингтонның шешімін қолдамайтынын жеткізді. Айта кетейік, Ашық аспан туралы келісімшарт 1992 жылдың наурыз айында қол қойылған. Оған сәйкес 35 мемлекет бір-бірінің аумағымен ұшып, әскери ахуалды бақылап отыруға келіскен.

Дональд Трамп, АҚШ президенті:

– Біздің Ресеймен қарым-қатынасымыз өте жақсы. Алайда Ресей ашық аспан туралы келісімді сақтамай отыр. Егер шартты орындамаса, біз келісімді тоқтатамыз. Бірақ жаңа жол табуға мүмкіндігіміз мол деп ойлаймын.