Адам ұрлағандар қолға түсті

Күдіктілер қала тұрғынын көлікке мінгізіп алып, көпқабатты үйдегі пәтерлердің бірінде қорқытып, 1 миллион теңге талап етті. Бұл туралы ҚазАқпарат хабарлады.

Ақтөбе облыстық полиция департаментіне 28 жастағы қала тұрғыны арыз түсірген. Арызда ол өзін ұрлап, белгісіз адамдардың ақша талап еткенін жазды.

«Жәбірленуші көрсеткен мекенжайда үш ер адам мен бір әйел адам ұсталды. Күдіктілерден ОСА травматикалық тапаншасы, «Мерседес» көлігінен пышақ пен травматикалық қару тәркіленді. Алдын ала белгілі болғаны, жәбірленуші інісімен қаланың ескі бөлігінде жүрген. Сол кезде белгісіз біреулер екі көлікпен келіп, тапанша тақап, машинаға отырғызып, жалдамалы пәтерге апарған. Сол жерде ұрып-соғып, 1 миллион теңге талап етеді. Таң ата бәрі ұйқыға кеткенде жәбірленуші үшінші қабаттағы балкон арқылы секіріп, қашқан. Бірден облыстық полиция департаментіне келіп, мән-жайды айтып берді» деп хабарлады облыстық ПД баспасөз қызметінің жетекшісі Ерболат Сарқұлов.

Айта кетейік, қазір Қылмыстық кодекстің «Адам ұрлау» бабы бойынша бірнеше сараптама тағайындалды. Үш ер адам ұсталып, қамалды.