Маңғыстау облысында Қазақстанға келу тәртібін бұзған 340 адам әкімшілік жазаға тартылды, деп хабарлайды «Хабар 24». Басым бөлігіне көші-қон заңдылығын сақтамағаны үшін іс қозғалды. Оларды полиция қызметкерлері арнайы жүргізілген рейд барысында қолға түсірді. Ұсталғандардың көбі Ақтау қаласындағы құрылыс нысандарында заңсыз еңбек еткен. Тұрғын үйлер мен ірі сауда ғимараттарын салуға жұмылдырылған. Барлық іс жинақталып, сотқа жолданды. Қазақстан аумағынан шығарылғандардың басым бөлігі Орталық Азия мемлекеттерінің азаматтары.
Асылбек Оразғалиев, ПД көші-қон полициясы басқармасының аға инспекторы:
— Профилактикалық шаралардың аясында аймақтағы барлық құрылыс нысандары, кафе-барлар, мейрамханалар мен көлік жуу орындарын тексеріп шықтық. Көбінесе Өзбекстан азаматтары заңды бұзған. Соттың шешімімен Қазақстан Республикасы аумағынан 55 адам шығарылды. Оларға 5 жылға дейін ел аумағына кіруге тыйым салынды.