37 жылқыны пойыз басып кетті

Ақмола облысында жүк пойызы бір үйір жылқыны қағып кетті. Бұл туралы Көліктегі полиция департаментінің баспасөз қызметіне сілтеме жасап ҚазАқпарат хабарлады.

«7 наурыз күні сағат 04.55-те Көкшетау стансысындағы Желілік полиция бөліміне «Қарағай-Уголки» аралығында жүк пойызының машинисі 37 жылқыны қағып кетуіне байланысты шұғыл тежеуге мәжбүр болғаны хабарланған. Оқиға орнына Көкшетау стансысындағы желілік полиция бөлімінің жедел-тергеу тобы шықты», — делінген ақпаратта. Көлік полицейлері жүргізген шаралардың нәтижесінде жылқылардың иесі — Ақмола облысының 43 жастағы тұрғыны анықталды. Ол ҚР ӘҚБтК-нің 559-бабының 1-бөлігі (темiржол бойында мал жаю) бойынша әкімшілік жауапкершілікке тартылып, оған 5 АЕК көлемінде айыппұл салынды.