3 баланың өліміне қатысты күдікті ұсталды

Шымкентте 3 баланың уланып, көз жұмуына қатысты оқиға бойынша күдікті ұсталды.

Айта кетсек, 2019 жылдың 3 қарашасында белгісіз заттан уланудың салдарынан 4 жасар және 1 жасар бала көз жұмған еді. Алдын ала берілген ақпарат бойынша олар тамақтан (нақтырақ айтқанда түшпара) улануы мүмкін екені хабарланды. 2020 жылдың 13 ақпанында да белгісіз заттан уланып, 8 айлық сәби шетінеді.

Екі жағдай да Еңбекші ауданының полиция басқармасында ҚР ҚК-нің 304-бабы (санитарлық ережелер мен гигиеналық нормативтердің бұзылуы) бойынша сотқа дейінгі тергеу амалдарының тізіміне енгізілген.

«Көптеген зерттеу жұмысының, тергеу амалдары мен сот-медициналық сараптаманың нәтижесінде балалардың өліміне не себеп болғаны анықталды. Тәжірибелі тергеуші мен жедел қызметкерлердің арқасында күдікті анықталып, полицияға жеткізілді. Ол – 42 жастағы ер адам. Анықталғанындай, ол қайғылы жағдайға дейін олардың үйінде зиянды жәндіктерге қарсы улы химикатпен дезинсекция жүргізген. Ол ауыл шаруашылығы саласына қолданылуы тиіс «Имидаклопридты» қолданған», — деп хабарлады ҚР ІІМ-нен.

Күдікті қазіргі уақытта екі айға уақытша ұстау абақтысына қамалды. Сотқа дейінгі тергеу амалдары жалғасуда.

ҚазАқпарат