10 мыңға жуық ресейлік Қазақстан ЖСН-ін алды

ҚР Ішкі істер министрінің бірінші орынбасары Марат Қожаев шетелдіктерге ЖСН беру мен азаматтық берудің ара-жігін түсіндірді, деп хабарлайды ҚазАқпарат.

«Қазақстандық ЖСН-ді кез келген шет елдің азаматы ала алады. Ол кәсіпкерлік қызметті, қаржылық операция процестерін және басқаларды жүргізу үшін керек. ЖСН – жай ғана құрал, ол азаматтықты немесе елде тұруға ықтиярхатты білдірмейді», — деді Марат Қожаев Мәжілістің жалпы отырысында тілшілерге берген сұхбатында.

Сонымен бірге ІІМ өкілі қазақстандық ЖСН-ді алуға қанша Ресей азаматы өтініш білдіргенін айтты.

«Өткен аптаның мәліметтері бойынша, 10 мыңға жуық адам ЖСН алды. Ресейдегі көптеген қаржы институттарының процедуралық жұмысына санкциялар кедергі келтірді, сондықтан олар бізге жүгінеді. ЖСН алғандардың біздің елімізге келуі де міндетті емес. Олар біздің банк карточкаларымызды ғана пайдалана алады», — деді Марат Қожаев.

Айта кетейік, жыл басынан бері Қазақстанға Ресейден 130 мыңға жуық адам келді, оның 120 мыңы кері оралған. Ал Украинаның 3481 азаматы елде жүр.